حنية القفا

بما اني اعبر بس عن رأيي الشخصي اللي ممكن يتفق مع حد تاني بيقرا .. ف انا شخصيا قفايا عزيز عليا اوي .. بتكلم بجد مش بهزر يعني و انا صغيرة بلعب مع اصحابي و نضرب ف بعض لو ايد حد منهم اتمدت على قفايا بالذات بزعل اوي .. معرفش ليه بس بحس انه إهانة اوي ..

مع كل خطاب من خطابات الرئيس السابق كنت بحس بالقفا ده .. عشان كدة ببقى متنرفزة اوي بعد كل خطاب .. بس خطاب 11-4-2011  او الرسالة الصوتية كانت بقى مش قفا لأ بجد فعلا و بدون إحراج حسيت و انا بسمعها بكف ايد الريس جاية بحنية على قفايا كدة و كذا قفا ورا بعض حنينين .. المشكلة ان ده اللي نرفزني اكتر .. القفا الحنين ده بجد وحش اوي ..

المشكلة الاكبر ان من كتر ما احنا بنتكلم على ام فلوس الريس و عائلته المبجلة بقى الموضوع يتعلق فقط بثروته و الجارديان تقول كلام و تكدبه و الصحف تتكلم فقط لا غير عن فلوس مبارك .. يعني هو لو كان قبل ما يمشي ادانا الفلوس و قلنا اتفضلو فلوسكو يا ابنائي العزاء كان خلاص كدة بالنسبالكو ؟؟؟؟ !!!

المشكلة مش مشكلة فلوس تولع الفلوس هنجيب غيرها و اكتر ف السنين اللي جاية .. المشكلة ف جرائم مبارك الانسانية التي لا تغتفر بأي شكل من الاشكال و اهم هذة الجرائم التغييب الفكري و العقلي و الذهني ل85 مليون شخص !! التغييب الفكري ده مصيبة لوحده .. مبارك تعمد إقصاء كل الكوادر اللي ف سنه او اصغر حتى لا يصبح ف الساحة من يصلح ليكون رئيسا غير مبارك الاب الحنون اللي عارف كل حاجة ف البلد .. و مش كدة بس لأ ده إقصاء كل الكوادر الشابة اللي ف عمر حبيب امه جمال مبارك حتى يتيح لفلذة كبده اكبر فرصة ممكنة انه يتمرمغ ف السياسة و ميبقاش فيه ف البلد حد عارف يفكر او يحكم غير جمال ..

و المشكلة الاكبر من المشكلتين اللي فاتو ان محمد حسني مبارك كذب الكذبة و صدقها و طالع ف الرسالة الصوتية بيتكلم عن فلوسه فقط و كأن جريمته الاولى و الاخيرة في حق الشعب هو سرقته ..

يا بني ادمين يا عاقلين يا حلوين .. اوعو تفتكرو ان انا و غيري بيفكرو زيي هنسكت لما مبارك يبقى متهم في قضية إهدار مال عام .. ده انا و الله اطلع اجري ف الشارع و ارمي الناس بالطوب .. جرائمه الإنسانية اكبر بكتير من جرائمه المالية .. هو قال هيتخذ الإجراءات القانونية ضد كل من افترى و كذب بخصوص ثروته لكن ها هيجيله نفس و قلب و لسان انه يطلع يقول هتهم كل من يقول اني افسدت الحياة السياسة و جعلها برطعة لكل من جمال و سوزان ؟؟؟

 

تهمة مبارك ليست و لن تكون إهدار المال العام و لكنها إهدار عقول شباب و امل مصر و  إخصاء كل من سولت له نفسه بأن يظهر على الساحة السياسية ... و احب اهديلكو ف الخر اغنية انغام مبتعلمش

Posted by Mirna el Helbawi at 3:52 PM